БИШКЕК, 19-окт. — Sputnik. Америкада жашаган кыргызстандыктар Азиз Мурадиллаевдин Индияда боло турган экинчи операциясына каражат топтоодо. Айтылганды GoFundMe краудфандинг платформасындагы маалыматтар далилдейт.
Акыркы маалыматтарга ылайык, учурда 67 кыргызстандык 2269 доллар чогултту. Ал эми операция үчүн 25 000 доллар керек.
"Достор, актер Мурадиллаевдин Индияда боло турган экинчи этаптагы операциясы үчүн каражат чогултууну улантуудабыз. Кайдыгер карабай үлүш кошууңарды суранабыз"— деп жазылган билдирүүдө.
Белгилей кетсек, 38 жаштагы актерге Москвадагы биринчи жасалган операция ийгиликтүү өттү.
Актер "Курманжан датка" фильминде Алымбек датканын ролун аткарганы менен белгилүү. Ошондой эле "Президент жана бомж", "Сүйүү сынагы", "Чиркин өмүр" сыяктуу белгилүү кинотасмаларда роль жараткан. Ал кинодон сырткары 40тай спектаклде ойногон.
