БИШКЕК, 15-окт — Sputnik. Борбор калаадагы Биринчи Май райондук ички иштер бөлүмүнүн жана Кылмыш иликтөө башкармалыгынын кызматкерлери шаардагы дүкөндө тоногон деп шектелген жаранды кармашты. Бул туурасында шаардык милициядан кабарлашты.
"Болжол менен таңкы саат 4.30дарда Биринчи май райондук бөлүмүнө 20-25 жаштагы азият түспөлүндөгү бала "Народный" дүкөнүнөн күч менен, 10 миң сом алып кеткендиги туурасында билдирүү келип түшкөн. Ал акчаны алгандан соң дароо из жашырган", — деп айтылат маалыматта.
Милиция талоончунун изине түшүп, жыйынтыгында шектүү катары Нарында туулган Н. К. аттуу 21 жаштагы баланы кармаган.
"Кылмыш иликтөө иштеринин жүрүшүндө анын Бишкек шаарынын Октябрь районунун аймагында да ушул сыяктуу кылмыш жасагандыгы аныкталды",— деп билдиришти Шаардык ички иштер башкармалыгынан.
Шаардык милициядан учурда Чүй аймагы жана Бишкек калаасы боюнча бул кылмышка тиешеси бар башкаларды аныктоо боюнча тиешелүү иштер башталганын айтышты.
