Күрөш өнөрү кыргыздардын канында бар экендигин, дегеле бул жаатта комплекстүү иш-чаралар зарылдыгын КРдин мурдагы ички иштер министри, КРдин Спорттук күрөш федерациясынын вице-президенти Мелис Турганбаев Sputnik Кыргызстан агенттигине айтып берди.
"Менин пикиримде кыргыз эли жекеме-жекеге беттешке – ат үстүндөгү оюндарга, күрөшкө күчтүү экенбиз. Бул биздин каныбызда бар да. Андыктан, спорттун ушул багыттагы түрлөрүнө комплекстүү мамиле керек болуп турат. Биз Рио шаарындагы Олимпиададан кийин ушундай ойго келип жатабыз. Кыргызстанда медаль ала турган кыргыз балдар толтура", — деди Турганбаев.
Экс-министр бул максатта Жаштар иши, дене тарбия, спорт боюнча мамлекеттик агенттик жана Кыргызстандагы спорттун түрлөрү боюнча майнап бере турган федерациялар ийри отуруп, түз кеңешүүнү баштарын кошумчалады.
Ал спортко бөлүнгөн каражатты спорттун болжол менен 10 түрүнө коротуп, каражатты максаттуу пайдалануу зарылдыгын айтты.
Турганбаев жакында эле Польшада өткөн ардагерлер арасында эркин күрөш боюнча дүйнө чемпионатында коло медалга ээ болгон.
