БИШКЕК, 13-окт. — Sputnik. Кыргызстан менен Грузиянын президенттери Алмазбек Атамбаев жана Георгий Маргвелашвили Тблисиде эки мамлекеттин ортосундагы кызматташуу тууралуу талкуулашты. Ал эми Кыргызстандын биринчи айымы Раиса Атамбаевага грузин лидеринин жубайы салттуу белек — башлык тартуулады. Бул тууралуу РИА Новости Грузия өлкө башчысынын маалымат кызматына таянуу менен билдирди.
Кыргызстандын президенти жубайы менен эки күндүк иш сапардын алкагында кечээ Грузияга келди. Атамбаевди грузин президентинин ордосунан ажо менен бирге эки өлкөнүн гимнин ойногон куралдуу күчтөрдүн оркестри тосуп алды.
"Жолугушуу учурунда Грузия президенти Атамбаевдин иш сапары эки өлкөнүн кызматташуусун өркүндөтүүгө өбөлгө болоруна ишеним артты. Саясий жактан кызматташуу тууралуу сөз болуп, диалогду активдештирүү каралды", — деп айтылат билдирүүдө.
Бүгүн, бейшемби күнү президенттердин бир катар макулдашууларга кол коеру күтүлүүдө. Маргвелашвили коопсуздук, экономика жана билим берүү жаатындагы бир катар келишимдер өнөктөштүккө түрткү болорун белгиледи.
Жолугушуунун алкагында КР президентинин жубайы Раиса Атамбаева Грузия президентинин жубайы Мака Чичуа менен маданият багытында кызматташуу боюнча бир катар маселелерди талкуулады.
"Сүйлөшүүлөрдүн соңунда Грузиянын биринчи айымы мейманга грузин элинин салттуу буюму — башлык тартуулады", — деп айтылат билдирүүдө.
Грузиядан соң Атамбаев Арменияга сапар алат.
Башлык — ноотудан жасалган уч жагы тик келген капюшон. Ал негизинен күн сууктаганда баш кийимдин үстүнөн кийилип, жаандан же күн нурунан коргойт. Эки жагында моюнга оролуучу өңүрү бар.
