БИШКЕК, 10-окт. — Sputnik. "Атанын керээзи" тасмасы Минск шаарына өтө турган беделдүү "Лістапад" эл аралык фестивалына чакырылды. Бул туурасында тасманын продюсери Төлгөбек Кочубек уулу кабарлады.
Тасманы режиссерлор Бакыт Мукул менен Дастан Жапар уулу тарткан.
Буга чейин Канаданын Монреаль шаарында өткөн кинофестивалда өз номинациясы боюнча баш байге — "Алтын зенитке" ээ болгон.
Эки саатка чукул созулган толук метраждуу "Ата керээзи" тасмасы "Кыргызфильм" жана "Элфильм" студияларында тартылып, башкы ролдордо Иман Мукул, Марат Алышпаев, Тынара Абдразаева, Бакыт Мукул жана башкалар ойногон.
Сценарийге ылайык, Америкада жашап жаткан Азат аттуу бала атасынын керээзи менен анын сөөгүн Кыргызстанга алып келет. Карыздарынан кутулуп, туугандары, достору менен жолугуп, жергиликтүү окуялардын күбөсү болот. Улам барган сайын Ата Журттун топурагы кымбат экенин сезип, Америкага кетер-кетпесин билбей арсар ойго батат.
