БИШКЕК, 4-окт. — Sputnik. Премьер-министри Сооронбай Жээнбеков Жалал-Абаддагы Сузак районунун Кызыл-Туу айыл аймагында жайгашкан жерлерди "Айыл чарба багытындагы жерлер" категориясынан "Калктуу конуштардын жерлери" категориясына которуу жөнүндө токтомго кол койду.
Өкмөттүн маалымат кызматынын билдирүүсүнө ылайык, Кызыл-Туудагы Алмалуу-Булак айылынын жер көчкүдөн жабыркаган тургундарына жана жер көчкү коркунучу бар башка аймактын жашоочуларына жер тилкелерин берүү каралган. Мындан улам 35 гектар кайрак айдоо жери калк отурукташа турган жерге которулат.
"Өкмөттүн Жалал-Абад облусундагы ыйгарым укуктуу өкүлүнүн аппараты жана Сузак райондук администрациясына жерди эсепке алуу документтерине тиешелүү өзгөртүүлөрдү киргизүү, зарыл болгон учурда жогорку чыңалуудагы электр берүү линияларын чыгаруу же куруу үчүн каржылоо булагын аныктоо тапшырмасы берилген", — деп айтылат маалыматта.
