БИШКЕК, 28-сен. — Sputnik. Американын Нью-Йорк шаарында 2001-жылдагы терактынын 15 жылдыгына арналган атайын иш-чара болуп, ага Кыргызстандан эки кошокчу аял барып катышып келди. Бул тууралуу Sputnik Кыргызстан агенттигине иш-чаранын катышуучулары Токтокан Чанчарова (Ала-Бука району) менен Бүсара Азимбаева (Чоң Алай району) билдирди.
Бул иш-чара 6-сентябрда башталып үч жумага созулган. Ага 15 мамлекеттен 30 кошокчу келген. Алар өз мамлекеттеринде маркумду кантип жоктоп, кантип кайгыра тургандыктарын көрсөтүп беришкен. Алар биринчи жума даярдыктарды көрүп, калган эки жумасында кошок айтуу салтын келгендерге көрсөтүп беришкен. Иш-чара кечки саат алтыда башталып, түнкү саат 12.00гө чейин уланган. Кыргызстандан баргандар кошокту кезек менен айтышкан.
Чанчарова бул иш-чарада кыргыздардын аза күтүү зыйнатын, өзгөчө аялдардын кошок айтуусун көрсөтүп бергенин айтат.
"Биздин тилди түшүнбөйт да, бирок анын муңдуулугу элдин көңүлүн бурду. Ар бир мамлекетте аза күтүү ар башка экен. Аны көрүп баары ыйлашты, тилин түшүнбөсө дагы жүрөк туят экен", — дейт ал.
Азимбаева Кыргызстанда каза болгон адамды жоктоп ыйлоо башка мамлекеттерден бир кыйла эле айырмалана турганын айтат.
Илимпоз Элмира Көчүмкулова бул иш-чарага актер же актрисаларды эмес, нукура айыл жеринде кошок айтып жүргөн кишилер тандалганын билдирди.
"Элечек сыяктуу кийимдерди кийип алып, кошокту жаттап алгандар болбосун деп талап коюшкан. Ошол аза күтүү салты кандай сакталып жатканын бүгүнкүдөй көрсөткүлө дешкен. Андыктан айыл жеринен кыргыздын салтын кармап, аны улантып келе жаткан апаларды тандап, уюштуруучуларга сунуштадык", — дейт Көчүмкулова.
Бул иш-чарага Орто Азиядан Кыргызстандан гана барышкан.
Быйыл Нью-Йорк шаарында өткөн бул көргөзмө кийинки жылы Лондондо дагы улантылат.
