БИШКЕК, 25-сен. — Sputnik. Улуттук коопсуздук кызматынын Кызыл-Кыя шаары боюнча бөлүм башчысы менен ушул эле шаарда жашаган ишкер жаңжалдаша кетип, бири-биринин үстүнөн арыз жазышканын ИИМдин Ош облусу боюнча башкы башкармалыгынын маалымат кызматынын жетекчиси Жеңиш Ашырбаев билдирди.
Буга чейин ЖМКларда Ноокат районунан Кызыл-Кыя шаарына келе жаткан жолдо бир ишкер башка кишилер тарабынан сабалганы маалымдалган. Кийин чекистти кармоо үчүн ыкчам аракеттеги атайын топ жиберилди.
Башкы башкармалыктын маалыматы боюнча окуя ишемби күнү эки айдоочунун ортосунда болгон.
"УКМКнын бөлүм башчысы жазган рапортто анын алдын машина айдаган киши тороп, өтүүсүнө тоскоолдук жаратканы жазылган. Машинадан түшкөн ишкер тапанча менен аны коркутканда УКМКнын кызматкери аны тартып алып, кийин аны милицияга өткөрүп берген. 15 мүнөттөн кийин Кызыл-Кыя шаардык ооруканасынын травматология бөлүмүнөн криминалдык мүнөздөгү жаракат алган киши тууралуу билдирүү келип түштү. Ооруканага ыкчам топ барды. Арыз жазган ишкер аны УКМКнын кызматкерлери сабап кеткенин айтып, бирок алардын аты-жөнүн атаган эмес", — дейт Ашырбаев.
ОИИБден бардык жагдай тергөө учурунда аныкталганын билдирди.
УКМК аталган окуя боюнча кызматтык иликтөө жүргүзөлөрүн, ага катыштыгы бар делген кызматкер иш ачык-айкын тергелиши үчүн ээлеген кызматынан четтетилгенин кабарлады.
