БИШКЕК, 8-сен. — Sputnik. Ошто аскер бөлүгүндө каза болгон кызматкердин агасы Алмаз Абдакимов инисинин башы жанчылып, мыкаачылык менен өлтүрүлгөнүн айтат.
"Башка тепкилеп, кекиртегин оюп салышыптыр. Ушунчалык мыкаачылык менен өлтүргөндөрүнө караганда бир-эки аскер эмес, беш-алтоосу сабаган окшойт", — деди ал.
Эске сала кетсек, Ош шаарындагы № 01525 аскер бөлүгүндө 7-сентябрь күнү катардагы аскер менен контракттык кызматтын ефрейтору Ташбалта уулу Эламандын ортосундагы чыр мушташууга айланып, кесепетинен ефрейтор каза болгон. Анын сөөгү өзү туулуп өскөн Ноокат районундагы Алашан айылында жерге берилди.
"Учурда командирлери окуяны жаап-жашырып биз менен байланышпай качып жатышат. Окуя болгон аскер бөлүгүнүн кызматкерлери, инимди ур-токмокко алган аскерлер же алардын ата-энесинин бири да келип көңүл айтып, кечирим сураган жок. Кечирим сурашса бир аз да болсо жүгүбүз жеңилдейт беле" — дейт маркумдун агасы.
Ал эми каза болгон аскердин атасы Ташбалта Абдакимов окуя тууралуу угуп, Ош шаардык ооруканасына келгенде уулу эчак эле каза болуп, сөөгү өлүкканада экенин айтат.
22 жаштагы Ташбалта уулу Эламан үй-бүлөдө беш бир туугандын төртүнчүсү болгон.
"Сүйлөшкөн кызы бар эле. Ушул күздө үйлөнмөк. Туяк да калган жок", — дейт уулунан ажырап кайгыга муунуп турган апасы Гүлнара Абдакимова.
Агасы Алмаз Абдакимов аскер бөлүктүн жетекчилиги иниси Эламандын өлүмү боюнча медициналык экспертизанын жыйынтыгын аларга билдирбей жаап-жашырганына нааразы экендигин айтат.
Ошто аскер бөлүгүндө каза болгон Ташбалта уулу Эламандын өлүмү боюнча кылмыш иши козголду. Бул тууралуу Ош гарнизонунун аскер прокурору Осмон уулу Динмухаммед билдирди.
Анын айтымында, каргашалуу окуяга шектелип учурда аскер бөлүктүн бир жоокери камакка алынды. Ага Ош гарнизонунун Аскер прокуратурасынан тергөө тобу тарабынан иликтөө иштери жүрүп, шектүүгө карата КР Кылмыш жаза кодексинин 104-беренеси боюнча денеге атайылап залал келтирген деген айып тагылууда.
Азырынча камакка алынган аскердин жактоочусу менен байланышууга мүмкүн болгон жок.
