БИШКЕК, 20-сен — Sputnik. Шанхай кызматташтык уюмуна мүчө мамлекеттердин куралдуу күчтөрүнүн кезектеги машыгуулары 2018-жылы Россияда өтөт. Бул тууралуу Кыргызстандын Башкы штабы билдирди.
Чолпон-Атада "Тынчтык миссиясы — 2016" машыгууларынын алкагында ШКУ өлкөлөрүнүн башкы штаб жетекчилеринин жыйыны өтүп, катышуучулар коргоо ведомстволорунун кооптуу маселелерге каршы күрөшүү аракетин күчөтүү зарылдыгын белгилешти.
Андан тышкары, аскердик машыгууларды мындан ары да өткөрүү муктаждыгы айтылып, жыйын соңунда протоколго кол коюлду.
ШКУ түзүлгөндөн бери "Тынчтык миссиясы" машыгуулары аталган уюмдун аймагында төртүнчү ирет өтсө, Кыргызстанда биринчи жолу болуп өттү.
Ысык-Көлдө өткөн машыгууларга Кыргызстан, Тажикстан, Россия, Кытай жана Казакстандын аскер кызматкерлери катышты. Ага 300 аскер техникасы менен 2 миңден ашуун жоокерлер тартылды.
