БИШКЕК, 7-сен. — Sputnik. Ош облусундагы №01525 аскердик бөлүгүндө ефрейтор менен катардагы жоокер мушташып, бирөө каза болгонун КР Куралдуу күчтөрүнүн Башкы штабы билдирди.
Маалыматка ылайык, окуя 6-сентябрда кечки саат жетилер чамасында болгон.
"№ 01525 аскердик бөлүгүнүн аскер кызматчылары контракттык кызматтын ефрейтору Ташбалта уулу Эламан менен мөөнөттүү кызматтын катардагы жоокеринин ортосунда кайым айтышуу болуп, ал мушташууга чейин жеткен. Анын кесепетинен ефрейтор Ташбалта уулу Эламан ар түрдүү жаракаттарды алып эс-учун жоготуп, Ош шаарындагы аймактык ооруканага жеткирилген. Бирок алган жаракаттарынан улам эсине келбей каза болгон", — деп айтылат Башкы штаб тараткан билдирүүдө.
Бул факты тууралуу Ош гарнизонунун Аскердик прокуратурасына билдирилип, окуя алардын көзөмөлүндө иликтөөгө алынды.
