БИШКЕК, 5-сен. — Sputnik. Көчмөндөр оюнунун алкагында көк бөрү боюнча өтүп жаткан мелдеште Казакстандын курама командасы өз тайпасында алдыда келе жатканын Жаштар иши, дене тарбия жана спорт боюнча мамлекеттик агенттиги билдирди.
Дүйшөмбү күнү Чолпон-Атадагы ипподромдо Кытай менен Америка командалары беттешип, оюн кытайлык спортчулардын пайдасына чечилди (20:4). Бул америкалыктардын экинчи утулуусу. Эртең кытай командасы Красноярскиден келген спортчулар менен күч сынашса, америкалыктар Казакстандын командасы менен ат салышат.
Көк бөрү боюнча кийинки мелдеш Казакстан менен Красноярскинин ортосунда жүрүп, казактар 15:2 эсебинде жеңишке жетишкен.
Бүгүн ипподромдо Түркия менен Афганистандын (саат 14.00) жана Кыргызстан менен Башкырстандын (15.30) командалары ойнойт.
Экинчи дүйнөлүк көчмөндөр оюндары 8-сентябрга чейин уланат.
Sputnik Кыргызстан маалымат агенттиги жана радиосу Дүйнөлүк көчмөндөр оюндарынын расмий медиаөнөктөшү болуп саналат.
