БИШКЕК, 4-сен. — Sputnik. Кыргызстандык жарандарды бошотуу маселесин кароо боюнча эки тараптуу сүйлөшүүлөр Өзбекстандагы аза күтүү иш-чараларына байланыштуу токтоп турганын Мамлкеттик чек ара кызматынан билдиришти.
Үстүбүздөгү жылдын 22-августунда такталбаган чек арага Өзбекстандын тик учагы келип конгон. Ал эми 24-августта Үңкүр-Тоодогу телемунаранын кызматкерлери Өзбекстандын Жаңы-Коргон РИИБине алып келинген.
"Жарандарды бошотуу боюнча сүйлөшүүлөр убактылуу токтотулду. Аза күтүү иш-чаралары аяктагандан кийин сүйлөшүүлөр жанданат", — деп айтылат маалыматта.
Мындан тышкары Өзбекстан эки күн мурда Кыргызстандын чек арасына жакын жерде аскерий машыгууларын баштаган.
"Аскерий машыгуулардын Үңкүр-Тоого эч кандай байланышы жок. Өзбекстан машыгуулар өтө тургандыгы тууралуу алдын ала кабарлаган", — деп Чек ара кызматынан билдиришти.
Өзбекстандын президенти Ислам Каримов жума күнү каза болуп, өлкөдө үч күн аза күтүү жарыяланды.
