БИШКЕК, 1-сен. — Sputnik. КСДП фракциясынын лидери Иса Өмүркулов президент Алмазбек Атамбаевдин Эгемендүүлүк салтанатында сүйлөгөн сөзүнө түшүндүрмө берди.
Атамбаев өлкө стабилдүүлүккө Убактылуу өкмөт менен жаңы Конституциянын жардамысыз жеткенин белгиледи. Ал өткөөл мезгилде мамлекеттин башына турган айрым саясатчылар мародерчулук, банк ячейкаларын уурдоо боюнча жооп бере тургандыктарын айтты.
Өмүркулов президент жүрөгүнүн түпкүрүнөн чыккан эмоционалдуу сөздөрүн айтканына токтолду.
"Өлкө башчы жалпы эл шайлаган президент катары айрым саясатчыларды сындоого укугу бар", — деди фракция лидери.
Эскерте кетсек, Атамбаев сүйлөп жаткан маалда экс-президент Роза Отунбаева сахнадан түшүп кеткен. Андан соң Убактылуу өкмөттүн мүчөлөрү билдирүү таратып, 2010-жылы өкүм сүргөн оор кырдаалда жасалган ар бир аракет жана кадам үчүн жооп берүүгө даяр экендиктерин айтышкан.
