Өнөрпоз 1986-жылы 28-августта Ош шаарында төрөлгөн. Ата-энесинин жалгыз уулу. Үй-бүлөсү чыгармачылыктан алыс адамдар болсо да Темир жаштайынан музыкага кызыккан.
Бизнесмен ырчы. Мектепти бүткөндөн кийин ата-энесинин каалоосу менен Ош Мамлекеттик универститетинин бизнес жана менеджент факультетине тапшырган. Бирок өжөр Темир бир жыл окугандан кийин кошумча ошол эле окуу жайдын искусство жана эстрада бөлүмүнө тапшырып алган.
2004-жылы борборго келип, продюсер Канат Култаев менен иштеше баштаган. Алгач "Туулган жер" аталышындагы ыры жарык көрөөрү менен эл оозуна алынып, миңдеген күйөрмандарды топтой алган.
Аша чапкан күйөрмандар. Темирди күйөрман кызы катуу жактырып калып, жигитин карабай коет. Ошондо ал жигит ырчыны айнеги караңгылатылган унаага салып, шаардын четине алып барып ал кыздан баш тартуусун суранган. Азыр ырчы "же ал кайсы кыз жөнүндө айтып жатканын билсемчи" деп жылмаюу менен эскерет.
Баса ырчы экс-кикбоксчу. Анын залакасынан мурдун коррекциялоо максатында эки жолу операция жасаткан.
Журналист өнөрпоз. Ырчыны биздин кесиптеш десек да жаңылышпайбыз. Ал буга чейин ОшТВда жаштар редакциясын жетектеп келген.
Учурда. 2016-жылдын башынан бери Темир Назаров чыгармачылыкка билек түрө киришип жаткан чагы. Негизи бул мырзаны мамлекеттик иш-чараларга байма-бай чакырышат. Жакында эле көчмөндөр оюнунун гимнин аткаруучуларынын катарын толуктады. Чыгармачылыктан тышкары жеке бизнеси бар.
Сыйлыктары. Түркияда өткөн эл аралык фестивалга эки ирет катышып, биринде лауреат аталса, экинчисинде алтын диск жеңип алган. 2009-жылы "Маданияттын мыкты кызматкери" төш белгисин тагынган.
