БИШКЕК, 28-авг — Sputnik. Кийинки жылы Улуттук банктын коллекциялык тыйындарында "Улуу кыргыз дөөлөтү" доорундагы кыргыздардын курал-жарактары түшүрүлөт. Бул тууралуу Улуттук банктан расмий сайтында маалымдалды.
2014-2023-жылдардагы план боюнча 2017-жылы коллекциялык 16 миң тыйын чыгарылат.
"Коллекциялык тыйындар үч серияда ("Кыргыз каганатынын доору", "Кыргызстандын Кызыл китеби" жана "Улуттук музыкалык аспаптар") чыгарылат. Биринчи серияда кыргыз жоокерлеринин курал-жарактарын жана зоот шаймандарын чагылдыруу каралган", — деп айтылат маалыматта.
Аталган коллекциялар 10 сомдук тыйындарга чыгарылат.
Улуу кыргыз дөөлөтү — кыргыздардын гүлдөп-өнүккөн доору. Бул мезгил 840-920-жылдарга дал келет. Ушул учурда кыргыздардын башы биригип, чөлкөмдөгү эң таасирдүү элге айланган.
