БИШКЕК, 27-авг. — Sputnik. Президент Алмазбек Атамбаев Үңкүр-Тоодогу маселе боюнча жыйын өткөрдү. Бул тууралуу президенттин маалымат кызматы билдирди.
Аталган жыйынга чек арачылар жана күч органдарынын жетекчилери катышты.
"Жыйын учурунда Алмазбек Атамбаев чек арадагы кырдаал боюнча маалымат алды. Ал эми күч органдарынын кызматкерлери айрым саясатчылар кырдаалды өз пайдасына пайдаланып, элди кайрадан нааразычылык акциясына алып чыгууну ниеттенип жатышкандыгын билдирди", — деп айтылат маалыматта.
Өз кезегинде президент башаламандыкка жол бербөө керектигин, Үңкүр-Тоодогу маселени дипломатиялык жол менен чечүү зарылдыгын билдирди.
24-август күнү коңшу өлкөнүн чек арачылары Үңкүр-Тоодо орнотулган телемунарада иштеген төрт кыргызстандык адисти кармап кетип, аларды Янги-Курган райондук милициясына алып барган.
