БИШКЕК, 24-авг. — Sputnik. Бакыт Мукул менен Дастан Жапар уулу тарткан "Ата керээзи" тасмасынын Монреаль шаарында өтө турган дүйнөлүк премьерасы 30-августка белгиленди. Бул тууралуу Кинематография департаменти билдирди.
Эскерте кетсе, эл аралык фестиваль 25-августта башталып, 5-сентябрга чейин созулат. Кыргызстандык тасма "Алгачкы фильм" сынагында ат салышып, үч күн — 30-31-август жана 1-сентябрда көрсөтүлөт.
Сценарийге ылайык, Америкада жашап жаткан Азат аттуу бала атасынын керээзи менен анын сөөгүн Кыргызстанга алып келет. Карыздарынан кутулуп, туугандары, достору менен жолугуп, жергиликтүү окуялардын күбөсү болот. Улам барган сайын Ата Журттун топурагы кымбат экенин сезип, Америкага кетер-кетпесин билбей арсар ойго батат.
Эл аралык Монреаль кинофестивалы дүйнөнүн 15 абройлуу сынактарынын катарына кирип, А категориясындагы иш-чара болуп саналат.
