БИШКЕК, 18-авг. — Sputnik. Кыргызстандын Малайзиядагы элчиси Кылычбек Султанов кызматтан алынганын президенттин маалымат кызматы билдирди.
Тиешелүү Жарлыкка Алмазбек Атамбаев бүгүн, 18-августта кол койду.
Ал эми Тышкы иштер министрлиги элчиликтерди оптимизациялоо максатында эки тараптуу кызматташтыктын өнүгүүсү байкалбаган өлкөлөрдөгү элчиликтерди жоюу же кайра уюштуруу пландалганын, андай элчиликтердин катарына Малайзия дагы киргенин белгилеген.
Эскерте кетсек, үстүбүздөгү жылдын башында Мешхеддеги (Иран) консулдук жай жабылган. Ал эми июнь айында Кыргызстандын Афганистандагы элчилигинин кызматкерлеринин саны кыскартылган.
Мындай өзгөрүүлөр боло тургандыгы тууралуу Султанов Бишкекке июль айында командировкага келгенде кабардар болгон.
Султанов аталган кызматты 2014-жылдан бери аркалап келет.
