БИШКЕК, 18-авг. — Sputnik. Баш мыйзамды өзгөртүү үчүн конституциялык кеңешме түзүү керек. Бул тууралуу мурунку өкмөт башчы Темир Сариев билдирди.
Анын айтымында, референдум жолу менен Конституцияга өзгөртүүлөрдү киргизүү мыйзам чегинде болушу зарыл.
"Мен учурдагы кырдаалга тыкыр көз салып турам. Жаңы өзгөртүүлөрдү кай бири колдосо, башкасы каршы чыгып жатат. Анткен менен ар бир маанилүү пикирди көз жаздымда калтырбоо керек", — деди Сариев.
Ал Конституцияга өзгөртүү киргизүүдөн мурда төмөнкү талаптар аткарылышы керек деген ойдо.
- Коомдук талкуу үчүн бөлүнгөн 30 күн аздык кылат. Бул аралыкта баш мыйзамды талкуулап бүтүү мүмкүн эмес.
- Эгерде бул коомдук талкуу болсо элдин пикирин ким чогултат? Бул ишти бийликтеги партиялар жасай турган болсо, бир тараптуу болбойт деп эч ким айта албайт.
- Конституциялык кеңешме куруу зарыл. Ал кеңешмеге бир гана бийлик эмес, оппозиция өкүлдөрү, карапайым калк жана укук тануучулар кириши зарыл.
- Коомдо Конституцияга өзгөртүү киргизүү боюнча кайчы пикирлер арбын. Андыктан калыстык менен гана элдин оюн угуу зарыл.
Эске сала кетсек, КСДП, "Кыргызстан", "Өнүгүү-Прогресс" жана "Республика-Ата-Журт" фракциялары референдум жолу менен Конституцияга өзгөртүүлөрдү киргизүүнү демилгелеп чыгышкан.
