БИШКЕК, 17-авг. — Sputnik. Кыргызстандын Малайзиядагы элчиси Кылычбек Султанов Алмазбек Атамбаевдин атына отставкага кетүү боюнча арызы менен кайрылды. Бул тууралуу Тышкы иштер министрлигинин маалымат кызматынан кабарлашты.
Буга чейин жалпыга маалымдоо каражаттары ишенимдүү булактарына таянып Султанов Конституциянын өзгөрүшүнө каршы экендигине байланыштуу иштен кетип жатканын жазып чыгышкан.
Үстүбүздөгү жылдын башында Мешхеддеги (Иран) консулдук жай жабылган. Ал эми июнь айында Кыргызстандын Афганистандагы элчилигинин кызматкерлеринин саны кыскартылган.
Мындан тышкары эки тараптуу кызматташтыктын өнүгүүсү байкалбаган өлкөлөрдөгү элчиликтерди жоюу же кайра уюштуруу пландалган. Андай элчиликтердин катарына Малайзия дагы кирген.
Мындай өзгөрүүлөр боло тургандыгы тууралуу Султанов Бишкекке июль айында командировкага келгенде кабардар болгон.
Комментарий үчүн Султановдун өзү менен байланышууга мүмкүнчүлүк болгон жок.
