Инспекция: кооптуу делген 23 челек элден оолак жайга чыгарылды

БИШКЕК, 17-авг. — Sputnik. Ново-Павловка айылында табылган 23 челек айылдын аймагынан алыс коопсуз жайга чыгарылды. Бул туурасында Sputnik Кыргызстан маалымат агенттигине Экологиялык жана техникалык коопсуздук боюнча мамлекеттик инспекциянын маалымат кызматынан кабарлашты.

15-август күнү Бишкектен 10 чакырымдай аралыкта жайгашкан Ново-Павловка айылынын аймагынан 200 литрлик челектер табылган. Анын айланасында чачылып жаткан бош желим баштыктардын сыртында бул заттын адамдын өмүрүнө жана айлана-чөйрөгө кооптуу экендиги жазылган.

"Табылган 23 челек тең Ново-Павловка айылынын аймагынан адамдарга зыянын тийгизбей турган жерге алынып чыкты", — деп билдирди маалымат кызматынан.

Аталган мамлекеттик инспекциянын аппарат жетекчиси Максат Өмүров кечээ ӨКМдин, Саламаттык сактоо министрлигинин, Айлана-чөйрөнү коргоо жана токой чарбасы боюнча агенттиктин өкүлдөрүнөн турган комиссия анын канчалык кооптуу экендигин иликтеп жаткандыгын билдирген.

Өмүровдун айтымында, аталган жерден 23 челек табылган. Ичин дат басып кеткен челектин бирөөсүн карай келгенде андан кара чайырга окшогон зат чыккан.