БИШКЕК, 16-авг. — Sputnik. II Дүйнөлүк көчмөндөр оюндарына (ДКО) карата билеттер 18-августтан тарта Бишкектин байланыш түйүндөрүндө сатыла баштайт. Бул тууралуу Sputnik Кыргызстан агенттигине ДКОнун катчылыгынан кабарлашты.
Маалыматка ылайык, билет сатып алуу үчүн жарандардын өздүгүн тактаган паспорт, айдоочулук күбөлүк сыяктуу документтер талап кылынат.
Билеттердин түсү ипподромдо бөлүнгөн зоналардын түсү менен бирдей болот. Мисалы, жашыл түстөгү билеттин ээси жашыл зонага отурат.
Ал эми кассага баргысы келбегендер менен чет өлкөлүк жарандар уюлдук телефондун Playmarket интернет дүкөнүнөн WorldNomadGames тиркемесин көчүрүп алуу менен билет сатып алса болот.
"Билетти мобилдик тиркеме аркылуу сатып алып жатканда жарандар жүзүн сүрөткө тартып туруп, аты-жөнү менен кошо биздин тиркеме аркылуу жөнөтүүлөрү керек. Система каттагандан кийин код берет. Билетти Интернет аркылуу сатып алууну каалагандар азыртан баштап ала баштаса болот", — деп белгилешти катчылыктан.
Маалыматка караганда билеттер Бишкек менен Оштун байланыш бөлүмдөрүндө сатылат. Азырынча Бишкекте сатыла турган түйүндөрдүн даректери белгилүү болду:
- Киев көчөсү, 114 дарегиндеги №1 шаардык байланыш бөлүмү;
- Токтогул көчөсү, 247 дарегиндеги №10 байланыш бөлүмү;
- Абдрахманов (мурдагы Совет) көчөсү, 6 дарегиндеги №20 байланыш бөлүмү;
- Абдрахманов менен Киев көчөлөрүнүн кесилишиндеги Кыргызтелеком.
- Ал эми Ош шаарында билеттерди Ленин көчөсү, 320 дареги боюнча жайгашкан Башкы почтамттан
- Чолпон-Ата шаарында Совет көчөсү, 122 дарегиндеги почта бөлүмүнөн алууга болот.
Экинчи дүйнөлүк көчмөндөр оюндары Ысык-Көлдүн жээгинде 3-8-сентябрь күндөрү өтөт. Мында 35 мамлекеттен келген спортчулар күрөш, салбурун, жаа атуу, интеллектуалдык оюндар жана спорттун башка түрлөрү боюнча ат салышат.
Sputnik Кыргызстан маалымат агенттиги жана радиосу Көчмөндөр оюндарынын расмий медиа өнөктөшү болуп саналат.
