Такси кызматынын жетекчиси Анарбек Момунов мындай компанияны ачууну мурун эле ойлонуп жүргөнүн айтат. Юридикалык жактан алганда бул кадимкидей эле такси, болгону кардарлардын телефон чалууларына майып адамдар жооп берет.
"Биз кыска билдирүү (смс – автор.) менен иштеген жаңы системага өттүк. Анда айдоочу кардар менен түз байланышат. Бул Каракол шаарында мындай ыкма менен иштеп жаткан биринчи такси кызматы. Андан тышкары, биздин негизги максат иш издегендерди жумуш менен камсыз кылуу болуп эсептелет", — дейт Момунов.
Алтынай Жыргалбекова шал оорусу менен ооруйт. Учурда ал такси кызматынын телефон чалууларды кабыл алуу бөлүмүндө сыноодон өтүп жатат. Алтынай жумушча өтүү үчүн экзаменди ийгиликтүү тапшырып, бул фирмада иштеп баштайм деп турат.
"Бул жерде айлык жакшы, ар бир нөөмөт үчүн 500 сом төлөйт. Чакан шаар үчүн бул жакшы эле акча", — дейт Жыргалбекова.
Бул такси кызматында иштейм дегендер көп. Кызматкерлер үчүн да шарт түзүлүп, эс алуу бөлмөлөрү да каралган.
