БИШКЕК, 5-авг. — Sputnik. Бүгүн президент Алмазбек Атамбаев Чолпон-Ата шаарындагы мамлекеттик резиденцияда өкмөттүн Ысык-Көл облусундагы өкүлү Асхат Акибаевди кабыл алды. Бул тууралуу өлкө башчынын маалымат кызматы билдирди.
Жолугушууда Ысык-Көлдүн жетекчиси президентке облусту социалдык-экономикалык өнүктүрүүнүн, инфраструктуралык долбоорлорду ишке ашыруунун жана региондун экономикасына инвестицияларды тартуунун жүрүшү тууралуу айтып берди.
Президент Ысык-Көл облусунда жарандар менен меймандардын эс алуусу жана коопсуздугу үчүн жергиликтүү бийлик бардык шарттарды түзүүгө тийиш экенин белгиледи.
Мамлекет башчысынын айтымында, Көл боюнда сентябрда өтө турган эл аралык ири иш чара — II Дүйнөлүк көчмөндөр оюндарынын катышуучулары менен келген конокторду жогорку деңгээлде тосуп алуу зарыл. Атамбаев бул Кыргызстандын беделин көтөрөрүн белгиледи.
