БИШКЕК, 21-июл.— Sputnik. Борбор калаадагы Манас проспектиси менен Фрунзе көчөсүнүн кесилишинде жол чырак иштебегендиктен жол кыймылын көзөмөлдөгөн жаранга Бишкек ШИИББ эскертүү берди. Бул туурасында Бишкек шаардык милициясынын маалымат кызматынан Sputnik Кыргызстан маалымат сайтына кабарлады.
Буга чейин аталган аймактагы тез татым борборунда иштеген Медер аттуу жигит жөнгө салып жаткандыгы кабарланган.
Кечээ ал жигит Ленин районундагы №1 шаардык милиция бөлүмүнө жеткирилип, ага түшүндүрүү иштери жүргүзүлгөн.
"Жол кыймылы боюнча эрежени бузгандыгы үчүн ал жаран Ленин районундагы №1 шаардык милиция бөлүмүнө жеткирилип, ал жерден эскертүү жасалып, кое берилди", — деп кабарлады шаардык милициянын маалымат кызматынын өкүлү Олжобай Казабаев.
Жол кыймылын жөндөгөн жаран мындан ары жол кыймылын өз алдынча жөндөбөөгө убада бергендигин маалымат кызматынан кабарлашты.
Буга чейин да апрель айында интернетке белгисиз жигиттин жол чырактын иштебей калганынан улам жаралган тыгынды жөнгө салып жаткан видеосу тараган.
