Эрдоган аскердик төңкөрүш аракети тууралуу кантип билгенин айтып берди

БИШКЕК, 21-июл. — Sputnik. Түркиянын президенти Режеп Тайип Эрдоган бийликти басып алууга болгон аракет тууралуу күйөө баласынан укканын айтты. 

"Албетте окуянын чоо-жайы тууралуу кийин такталган маалыматтарды алдык. Бирок, мага бийликти басып алууга болгон аракет тууралуу күйөө балам айтты. Алгач укканда буга анчейин маани берген эмесмин", — деген пикирин Эрдоган Al-Jazeera телеканалынын журналистинин "бийликти басып алууга болгон аракетти алгач кимден уктуңуз" деген суроосуна жооп берип жатып билдирген.

Буга чейин маалымдалгандай, Түркиянын улуттук чалгындоо уюму төңкөрүш кылууга болгон аракеттер тууралуу маалыматты жума күнү саат 16.00дөр чамасында алган. Козголоңчулар алардын планы билинип калгандыктан төңкөрүш кылуунун убактысын жылдырганын ЖМКлар жазып чыгышты. Алгач алар төңкөрүштү 16-июлда саат 03.00дө кылууну пландашкандыгы айтылган.

16-июлга караган түнү Түркияда козголоңчулар аскерий төңкөрүш кылууга аракет кылышкан. Негизинен окуялар Анкара жана Стамбул шаарында болгон. Акыркы маалыматтарга ылайык, бул каргашадан 290 киши каза болуп, 1,5 миңдей киши түрдүү жаракаттарды алган.

Күч түзүмдөрү төңкөрүштү уюштуруу аракетине тиешеси бар деген шек менен 10 миңден ашык кишини кармаган. Алардын ичинде 118 генерал жана адмиралдар бар.