Ура, алтын биздики! Кыргызстандын КВН боюнча командасы "Азия Mix" "Голосящий КиВиН 2016" фестивалында "Алтын чоң КиВиН" утуп, 400 миң рубль алды. Биздин шайырлар жана тапкыч балдарды бул жеңиши менен куттуктайбыз. Сыйлык команданыкы болгону менен, сыймык Кыргызстандыкы. Ал эми утуп алган 400 миң рублга Маратикке чоң шоколад ала турганын КВНчилер билдирди.
Кыргызстандык жарандын алты саны аман. Түркияда аскердик төңкөрүш кылууга аракет болгондон бери туугандарына байланышка чыкпай жаткан кыргызстандык аял табылды. Ал 16-июлдан бери туугандарына байланышка чыкпай жаткан. Кудай жалгап мекендешибиздин алты саны аман экенин ал туугандарына байланышка чыгып айткан. Бөөдө кырсыктан алыс болуп, дүйнөдө тынчтык болсунчу.
Жакшы сөз жан эргитет… Түркиядагы калаба жалпы дүйнөнүн көңүлүн бурду. Төңкөрүш жасоо, аны басуу аракетинен акыркы маалыматтар боюнча 265 киши каза болгон. Мындай каргашада жылуу сөз айтуу ар бир эле пенденин парзы болсо керек. Россиянын президенти Владимир Путин Тайип Эрдоганга телефон чалып, түрк элинин аза кайгысын тең бөлүштү. Дүйнөдө ылайым эле тынчтык орноп, согуш болбосунчу.
Чыккынчыларга өлүм. Түркия 16-июлдун түнүндө болгон окуядан эми гана өзүнө келип баштады. Карапайым калк өлкөдө бүлүк салгандарды өлүм жазасына тартуу керектигин айтып, жер-жерлерде митингге чыгууда.
Өз элине, мекенине кыянат кылгандардан Кудай сактасын.
Барымтада калган полиция. Түркиядагы аскердик төңкөрүшкө болгон аракеттин илеби сууй электе Армениянын борбору Ереван шаарындагы полициянын имаратын куралчан топ басып алды. Алар бир нече кишини барымтага алып, бир полиция каза болду. Достор келгиле согушу жок дүйнөдө жашоого аракет кылып, мындай жосунсуз жоруктардын алдын алууга барылып жардам береличи.
Башкаларга үлгү болуп… Алты саныбыз аман, агарып аткан таңды, кызарып баткан күндү көрүү, шаркырап аккан суунун, булбулдун сайраганын угуу өзүнчө эле керемет. Бирок, ушундай сонун нерселерди укпаган кишилер тууралуу кандай ойлойсуз… Төрөгелди Каныбек уулу кичинекейинде менингит менен ооруп, кулагы укпай калган. Айланасы дайыма "тынчтыкта" жашоо кандай экенин журналист Гүлдана Талантбекова билип көрдү. Ойго салчу маекти бул жактан окуңуз.
Валюта баасы. Бүгүн борбор калаадагы акча алмаштыруу жайларында доллардын сомго карата болгон орточо курчу 67.30 сом.
Мунай баасы. Бишкекте майдын баасы төмөндөгүдөй: Аи-95 наркы 38 сом, Аи-92 үлгүсүндөгү май 35 сом, ал эми дизель майы 30 сом 50 тыйындан сатылууда.
Соңку сөз ордуна. Ой жеткен жерге кол жетет.
