БИШКЕК, 15-июл. — Sputnik. Бишкектин аймагында сойкулукка каршы иш-чаралар уланып жатканын Бишкек шаардык милициясынан билдиришти.
Жүргүзүлгөн оперативдик-издөө иштеринин натыйжасында, сойкулардын кызматын сунуштаган сауна табылган.
"Аталган иш боюнча Кылмыш жаза кодексинин 261-беренесинин негизинде кылмыш иши козголду. Саунаны иштеткендерди кылтакка илүү үчүн криминалдык адистер акчаларга атайын белгилерди коюшкан. Натыйжада, секс-кызмат көрсөткөн саунада иштеген 42 жаштагы аял кармалды. Ал сауна ачылгандан бери администратор болуп иштеп келгени тууралуу маалымат бар. Ал учурда убактылуу кармоочу жайга киргизилди", — деп айтылат маалыматта.
Издөө иштери маалында алдын ала атайылап белги коюлган акчалар табылган. Кармалган аял сойкулар менен кардарларга ортомчу болуп иштегенин мойнуна алган.
Учурда иликтөө иштери уланып жатат.
