БИШКЕК, 8-июл. — Sputnik. Белгилүү манасчы Замирбек Баялиев Саха республикасында өтүп жаткан "ЮНЕСКО шедеврлеринин Олонхо жеринде жолугушуусу" аттуу эл аралык фестивалга катышып жатканын "Замандаш" ассоциациясы билдирди.
Иш-чара 2008-жылы негизделген. Быйыл аталган фестивалга 10 мамлекеттин ЮНЕСКО тизмесине кирген дөөлөттөрүн — кыргыздардан манасчылар, Кытайдан Куньцюй операсы, Индиянын "Рамаяна" эпосунун негизиндеги Бхаратанатьям бийи, кореялыктардын пхансори эпикалык ыры жана якутиялыктардын "Олонхо" эпосу катышууда.
Ал эми 6-июлдан 16-июлга чейин өтө турган эл аралык спорттук мелдешке 16 жашка чейинки 30 мамлекеттен келген үч миңден ашык спортчу күч сынашат. Кыргызстандын атынан спорттун 15 түрү боюнча 90 спортчу катышууда. Мелдеш жалпысынан спорттун 22 түрү боюнча өтөт.
