БИШКЕК, 7-июл. — Sputnik. Бишкектеги ТЭЦте жаңылоо иштерин аткарып жаткан кытай жарандарынын ортосунда жаңжал чыкканын шаардык милициядан тастыкташты.
"Жаңжал шейшемби күнү эле болгон. ТЭЦте жаңылоо иштерин аткарган кытай жарандарынын айрымдарынын үй-бүлөсү суу ташкынынан жапа чеккени аныкталган. Аларды жетекчилик үйүнө жиберүүгө ашыкпаганына жиндери келген. Ошондон улам түшүнбөстүктөр болгон", — деп ШИИБдин маалымат катчысы Олжобай Казабаев билдирди.
Ал ошондой эле шаршемби күнү жумушчулардын көбү мекенине, үй-бүлөсүнө учуп кеткенин айтты. Эскерте кетсек, Кытайда катуу жааган жаандан улам суу ташкындап, анын натыйжасында 186 адам ажал тапкан.
"Электр станциялары" ишканасынын маалымат кызматы жаңжал жайгарылганын маалымдады.
Бишкек ТЭЦтин жаңылоо иштери 2013-жылы башталган. 386 миллион доллар саптала турган ишти Кытайдын ТВЕА компаниясы ишке ашырууда. Ал 2017-жылы аяктап, Кыргызстандын көмүрүн жагууга ылайыкташат. ТЭЦ толук аяктагандан кийин анын кубаттуулугу 812 мегаватт болот.
