БИШКЕК, 7-июл. — Sputnik. Кыргызстан Дүйнөлүк көчмөндөр оюнун башкаларга бергиси келбейт. Мындай пикирин Маданият, маалымат жана туризм министринин орун басары Азамат Жаманкулов КМШ өлкөлөрүнө мүчө мамлекеттердин туризм боюнча кеңешинин Бишкекте өткөн жыйынында билдирди.
"Бул долбоор жыл сайын өтүп, ал чыныгы көчмөн турмушту, маданиятты жана салтты алып жүргөн мамлекет катары Кыргызстанды тааныта турган иш-чара болушун каалайбыз", — деди ал.
Жыйынга КМШнын аткаруу комитетинин, Россиянын, Белоруссиянын, Өзбекстандын Азербайжандын дипломатиялык өкүлдөрү жана эл аралык ЖМКлар катышып, биргелешкен туристтик долбоорлор менен келечектеги пландар талкууланды.
КМШга мүчө мамлекеттердин туризм боюнча кеңеши 2012-жылы 30-майда түзүлгөн.
II Дүйнөлүк көчмөндөр оюндары Ысык-Көлдө 3-8-сентябрь күндөрү өтөт.
