БИШКЕК, 3-июл. — Sputnik. Кытайдын түштүгүндөгү Гуандун провинциясында нааразылыкка чыккан эл менен кагышкан полициянын бир нече кызматкерлери жарадар болду. Эл өкмөттүн аталган аймакка таштанды жага турган заводун куруу чечимине каршы чыккан. Бул туурасында РИА Новости Ассошиэйтед Пресске таянып кабарлады.
Агенттик берген маалыматка караганда, өкмөттүн чечимине нааразы болгон он миңге чукул киши Лубу шаарында көчөгө чыккан. Калаа тургундары электр энергиясын иштеп чыга турган таштанды жаккан завод аба менен сууну булгап, элдин ден соолугуна зыян алып келет деген пикирлерин билдирген.
Басылмалар социалдык тармакта эл өкмөттүн имаратын камалоого алып, бирок полиция ага каршылык көрсөткөндүгүн талкуулап жаткандыгын жазды. Нааразылыкка чыккан эл менен кагышкан полициянын бир нече кызматкерлери жарадар болгондугу да кабарланып, бирок ал маалыматтар жарыялангандан бир нече убакыт өткөндөн кийин өчүрүп салынган.
