БИШКЕК, 30-июн. — Sputnik. Жогорку Кеңеште террористтерге жана экстремисттерге жоопкерчиликти күчөтүү боюнча мыйзам долбоору үчүнчү окууда каралды.
Мыйзам долбоору эл аралык терроризм жана экстремизм чөйрөсүндөгү кылмыштар үчүн жоопкерчиликти күчөтүү максатында иштелип чыккан.
Ал террористтик же экстремисттик ишти үгүттөгөнү жана эл алдында ачык жактырганы үчүн администрациялык жоопкерчиликти, куралдуу кагылышуу же согуштук аракеттеги зоналарга жашы жетпегендерди алып барганы, терроризм актылары жөнүндө көз көрүнө жалган билдиргени, мамлекеттик же коомдук ишмерлердин өмүрүнө кол салганы үчүн жазык жоопкерчиликти күчөтүү боюнча чараларды кабыл алууга багытталган.
Демилге аркылуу терроризм жана экстремизм чөйрөсүндөгү кылмышкерлерге мунапыс жана жеңилдетилген жазалоо колдонулбастыгы боюнча тиешелүү мыйзамдарга түзөтүүлөр сунушталган.
Мыйзам долбоору 3-окууда добуш берүүгө жиберилди.
