БИШКЕК, 16-июн. — Sputnik. Кыргызстандын аскер соту Курманбек Бакиевдин тарапкерлери тарабынан мунапыс жөнүндөгү аппеляциясын жокко чыгарып, аны өмүр бою абакка кескен буга чейинки инстанциянын өкүмүн күчүндө калтырды. Бул тууралуу Жогорку соттун маалымат кызматы билдирди.
Сот коллегиясы Курманбек Бакиев боюнча биринчи инстациянын өкүмү — мүлкүн камакка алуу менен өмүр бою абакка кесүү жана үч жылга чейин айрым кызматтарда иштөө укугунан ажыратууну күчүндө калтырган.
Жаныбек Бакиев боюнча да биринчи инстациянын өкүмүн күчүндө калтырды. Ага ылайык, Бакиевдин мүлкү камакка алынып, өмүр бою абакка кесилген. Андан сырткары үч жылга чейин айрым кызматтарда иштөө укугунан ажыратылган.
Марат Бакиевге дагы мунапыс берүүдөн баш тартылды. Ал бардык мүлкүн камакка алуу менен 27 жылга эркинен ажыратылган.
Данияр Үсөновду дагы өмүр бою эркинен ажыратуу боюнча өкүм күчүндө калды.
"Соттолуп жаткан Сатыбалдиев, Жолдошалиев, Жороев, Турсункулов, Суталинов, Темирбаев, Дунгановго карата "КРдин көз карандысыздыгынын 20 жылдыгына байланыштуу мунапыс жөнүндө" жана "Адам укуктарынын жалпы декларациясынын 65 жылдыгына байланыштуу амнистия жөнүндө" мыйзамына ылайык мунапыс берилди", — деп айтылат Жогорку сот тараткан маалыматта.
Өкүм жарыяланган күндөн тарта күчүнө кирет.
2010-жылдын 7-апрелинде бийликтин жүргүзгөн саясатына макул болбогон карапайым калк "Ала-Тоо" аянтына чыгып, ал кездеги президент Курманбек Бакиевди тактан кулаткан. Ошол күнү бийликтин огунан 80ге адам каза таап, Бакиев өлкөдөн чыгып кетүүгө аргасыз болгон. Кыргызстандын келечеги үчүн көз жумган эр-азаматтардын бир катарларынын сөөгү "Ата-Бейит" комплексине коюлган.
2010-жылдын 7-апрели боюнча сот алты жылдан бери созулуп келет.
