БИШКЕК, 17-июн. — Sputnik. Жалпыга маалымдоо каражаттары (ЖМК) тууралуу мыйзамына киргизилип жаткан өзгөрүүлөрдүн радиолорго тиешеси жок. Ал эми телеканалдарга бир гана кыргызстандык жарандар ээлик кылуусу керек. Бул тууралуу авторлордун бири Кожобек Рыспаев билдирди.
Буга чейин мыйзам долбоорунда чет элдик жарандар өлкөдөгү ЖМКлардын 20 пайызына гана ээлик кылуусу каралган. Мындан сырткары, Кыргызстандагы ЖМКларга бир гана кыргыз жарандары, мамлекеттик органдар, саясий партиялар ээ боло алышат.
"Мыйзам кабыл алынса чет элдик жарандар Кыргызстандагы телеканалдардын ээси боло алышпайт. Мыйзамдын радио жана гезиттерге тиешеси жок", — деди Рыспаев.
Ал кеп бир гана телеканалдар тууралуу болуп жатканын айтып, аларга ээлик кылган чет элдиктердин үлүшү 35 пайыздан ашпашы керектигин кошумчалады.
Социалдык изилдөөлөргө ылайык телеканалдар адамдардын 90 пайызынын коомдук пикирин жаратып, ой-жүгүртүүсүнө таасир этет.
