БИШКЕК, 14-июн. — Sputnik. Акыркы жыйырма жыл ичинде коопсуз жайга деңиз жолу же кургактык менен сапар алган 60 миңден ашуун мигрант өлүп же белгисиз жоголгон. Бул туурасындагы Миграция боюнча эл аралык уюм жарыялаган докладда айтылат.
Докдал "Ажалдуу саякаттын экинчи тому: каза таап же белгисиз жок болгон мигранттарды таануу жана издөө" деп аталып, 1996-жылдан берки келе жаткан абал анализденген.
Уюм тараткан статистикага таянсак, былтыр 5,4 миң мигрант каза таап же жоголгон. Быйыл Европага сапар алган ар бир качкындын 25-си каза тапты. Кайгылуу окуянын 80 пайызы Жер ортолук деңизинде болууда.
Аталган уюм былтыркы жылдын октябрь айында Италиянын Лампедуза аралында кеме чөгүп кетип, кеминде 500гө чукул адам өлгөндөн бери Жер ортолук деңиздин суусунан 10 миңге чукул качкын каза таап же белгисиз болгонун кабарлады.
