БИШКЕК, 14-июн. — Sputnik. Свердлов районуна караштуу милициянын 11-шаардык бөлүмүнүн жетекчиси өзүнүн кызматкерин суицид жасоого түрткөн эмес. Бул тууралуу Бишкек шаардык ички иштер башкармалыгынын жетекчисинин милдетин аткаруучу Самат Курманкулов билдирди.
Буга чейин маалымат каражаттарында Ош облусуна караштуу Кара-Суу районундагы Учар айылында 12-май күнү 26 жаштагы Тынчтыкбек Ахматалиев өзүнүн үйүндө асынып калгандыгы тууралуу маалымат жарыяланган.
Ал милициянын 11-шаардык бөлүмүндө аймактык милиция кызматкери болуп эмгектенген.
Маркумдун ата-энеси менен жубайы анын өз өмүрүнө кол салуусуна 11-шаардык бөлүмдүн жетекчиси Талант Аттокуровду себепкер деп айтышкан.
"Кызматтык иликтөө жүргүзүлдү. Тагылган айып негизсиз болуп чыкты. Себеби Аттокуров февраль айында жумуштан четтетилсе, суицид май айында болгон", — деп билдирди Курманкулов.
Тынчтыкбек Ахматалиев үйдүн жалгыз уулу болгон.
