БИШКЕК, 13-июн. — Sputnik. 15-июндан 17-июнга чейин өлкө аймагында туруксуз аба ырайы күтүлүп, мезгил-мезгили менен нөшөрлөп жаан жаап, бийик тоолуу аймактарда кар түшүшү мүмкүн. Бул тууралуу Кыргызгидромет билдирди.
Маалыматка ылайык, бул күндөрү кээ бир райондордо батыштан соккон шамалдын ылдамдыгы секундасына 18-23 метрге чейин жетет.
16-17-июнда абанын күндүзгү температурасы төмөндөп: Чүй, Талас, Ош, Жалал-Абад, Баткен облустарынын дыйканчылык аймактарында 21…26 градус, тоо этектеринде жана Ысык-Көл, Нарын облустарынын дыйканчылык аймактарында 14…19 градус жылуу болот. Ал эми бийик тоолуу райондордо 2 градус сууктан 3 градуска чейин жылуу болот.
Мындай туруксуз аба ырайы айыл чарба иштерин, автоунаа, энергетика жана коммуналдык кызматтардын ишин жана жайыттарда мал кармоону кыйындатат.
Кыргызгидромет туруксуз аба ырайынан улам республиканын дарыяларынын деңгээли көтөрүлүп, сел жүрүү коркунучу жогору.
