БИШКЕК, 9-июн. — Sputnik. Чубак ажынын билдирүүсү тууралуу Дин боюнча мамлекеттик комиссияга кайрылуу жасоону Жогорку Кеңештин отурумунда депутат Альфия Самигуллина сунуштады.
Эске сала кетсек, жума намазы үчүн ошол күнкү түштөнүү убактысын бир саатка узартуу мыйзам долбоору парламенттин тармактык комитетинде каралып, ага бир канча депутаттар каршы чыккан. Мыйзам долбооруна каршы чыккандардын арасында аталган депутат да болгон. Депутаттардын мындай чечимине экс-муфтий Чубак ажы кескин сын айтып, анын сөзү кызуу талкууга жем таштаган.
Самигуллина жума күнү намаз үчүн түшкү дем алууну узартууга каршы экенин баса белгиледи.
Ал эми эл өкүлү Рыскелди Момбеков бул чыр боюнча дин ишмерлери мамлекеттик башкарууга кийлигишип жатат деген пикирин айтып, маселеге өкмөт да, Жогорку Кеңеш да чара көрүүсү зарыл экенин белгиледи.
