БИШКЕК, 7-июн. —Sputnik. Sputnik.Пикирлер сурамжылоосунун натыйжасында америкалыктардын 68 пайызы Сауд Аравия терроризмди каржылабай турганын далилдегенге чейин АКШ аталган өлкөгө колдоо көрсөтүүнү чектеп же биротоло токтотушу керек деген пикирин билдирген. Мындай маалымат Sputnik маалымат агенттиги жана радиосунун тапшырыгы менен Британиянын Populus компаниясы тарабынан жасалган иликтөөдө айтылды.
Америкалыктарга Сауд Аравиядан чыккан демөөрчүлөр "суннит террордук уюмдарын каржылай турган ири булак" деп айтылган Хилари Клинтондун каттарын эстеп, АКШ аталган өлкөгө карата кандай саясатты карманыш керектиги боюнча өз пикирин билдирүү сунушталды. Америкалыктардын болгону 12 пайызы гана Сауд Аравиясын өнөктөш катары колдоо керек десе, 20 пайызы "билбейм" деп жооп кайтарган.
Коомдук пикирди изилдөө боюнча эл аралык долбоор 2015-жылдын январында башталган. Долбоордун өнөктөшү белгилүү Populus жана Ifop изилдөө компаниялары болду. "Sputnik. Пикирлер" долбоорунун алкагында Европа жана АКШ өлкөлөрүндө маанилүү социалдык жана саясий маселелер боюнча сурамжылоолор үзгүлтүксүз жүргүзүлөт.
Sputnik (sputniknews.com) — ондогон өлкөлөрдө мультимедиялык маалыматтык хабдарга ээ маалымат агенттиги жана радио. Sputnik өзүнө сайттарды, аналогдук жана санарип радиоберүү, социалдык тармактарда баракчаларды камтыйт. Sputnik маалымат түрмөгүнө жазылгандар үчүн англис араб, испан жана кытай тилдеринде кабарлар күнү-түнү жаңыланып турат.
