БИШКЕК, 29-май — Sputnik. Түркиянын Стамбул шаарындагы Сүтлүже паркына Манас баатырдын эстелигин коюу үчүн жер бөлүндү. Бул тууралуу Sputnik Кыргызстан агенттигине жеке ишкер Темирлан Сарлыкбек уулу билдирди.
Анын айтымында Стамбул шаарынын мэриясы жер бөлүп берүү тууралуу тийиштүү документтерге кол койгон.
Сарлыкбек уулу өткөн жылы башка парктан жер берилгенин бирок, ал паркта 2,5 метрден бийик эстеликтерге уруксат берилбегендигинен жаңы жер сурап кайрылганын кошумчалады.
"Парк Стамбулдун Халич кысыгында, дениздин жээгинде жайгашкан жана шаардын эң баалуу жерлеринен болуп саналат. Айкел орнотулгандан кийин паркты "Манас" паркы деп да атоо боюнчы сүйлөшүүлөр жүрүүдө", — дейт Сарлыкбек уулу.
Бийиктиги 7 метр болгон, колодон ат минип турган "Манас" баатырдын эстелигин жасоо иштери башталарын, эстеликтин келбети азырынча толук чечиле электигин ал баса белгиледи.
"Эстеликтин кандай болоору Кыргызстандагы жана Түркиядагы белгилүү айкелчилер, манасчылар жана Манас таануучулары менен кеңешкенден кийин белгилүү болот. Азырынча эскиздердин үстүндө иш жүрүүдө", — дейт ал.
Сүтлүже паркында 1458-жылында курулган Эйүп Султан мечити, Миниатүрк музейи жана башка көптөгөн Түркиянын тарыхый имараттары жайгашкан. Парк Стамбулдун Европа тарабында орун алган.
Темирлан Сарлыкбек уулу буга чейин "Манас" эпосунан үзүндүлөрдү кыргыз, түрк, орус жана англис тилдеринде даярдап "Манас — адамзат тарыхынын мурасы" деген китеп чыгарган.
