БИШКЕК, 25-май — Sputnik. Жогорку Кеңештин пленардык жыйынында Вьетнам мамлекети менен Кыргызстандын ортосунда эркин соода жүргүзүү боюнча макулдашууну ратификациялоо маселеси каралды.
Мыйзам долбоорун баяндаган депутат Арзыбек Кожошев алдыда 90 миллиондук рыноктун ачылышы күтүп турганын белгиледи.
"Вьетнам менен болгон келишим Кыргызстан менен гана эмес, ЕАЭБ өлкөлөрүнүн алкагында жүрүп жатат. Келишимди ратификациялай турган болсок, аталган өлкө менен эркин соода жүргүзүүгө шарт түзүлөт", — деп билдирди Кожошев.
Анын айтымында, Кыргызстан Вьетнамдын аймагына негизинен алкоголдук ичимдиктерди экспорттой алат.
"Ичимдиктерден сырткары эт менен жибекти дагы сатууга болот", — деп билдирди Кожошев.
Айрым депутаттар Вьетнамдан товарлар импорттолуп баштаса жергиликтүү соодагерлер жабыр тартып калуусу ыктымал экенин билдиришти. Бирок министр андан кам саноого кажет жок экенин айтты.
"Эркин соода жүргүзүүгө уруксат берилгени менен атайын чектер коюлат. Мисалы товардын саны 100 бирдиктен ашса кошумча бажы төлөм киргизилет", — деп билдирди Кожошев.
Ал эми депутат Мирлан Жээнчороев мыйзам долбоор алты фракцияда тең колдоо тапканын белгилеп, кесиптештерин долбоорду колдоп коюуга чакырды.
Белгилей кетсек, мыйзам долбоор экинчи окууда каралып добуш берүүгө жөнөтүлдү.
