БИШКЕК, 18-май — Sputnik. Баткен облусундагы мектептерде "Жол кыймылынын жаш инспекторлору- 2016" аттуу кароо-сынак өттү. Бул тууралуу облустук ички иштер башкармалыгы билдирди.
Кароо-сынактын максаты — жаш өспүрүмдөр арасындагы ар кандай укук бузуулардын жана жол кырсыктарынын алдын алуу болуп саналат.
Бул сынакка Сүлүктү, Кызыл-кыя, Баткен шаарлары жана Кадамжай, Лейлек, Баткен райондорунан мектеп окуучуларынын командалары келип катышты.
Биринчи орунду Айдаркен шаарынан келген №20 Маканов орто мектебинин окуучулары алды. Алар 23-майда Бишкек шаарында өтүүчү республикалык кароо-сынакка катышууга жолдомо алышты.
Катышуучулар баалуу белектер жана ардак грамоталар менен сыйланды.
