БИШКЕК, 14 мая — Sputnik. "Жеткиликтүү турак жай" программасынын негизинде кыргызстандык 21 жаранга ипотекалык насыя берилди. Бул тууралуу Sputnik Кыргызстан агенттигине Мамлекеттик ипотекалык компаниясынан билдиришти.
Насыяны биринчилерден болуп эмгек стажысы үч жылдан кем эмес дарыгерлер, мугалимдер жана социалдык кызматкерлер ала алышат.
Каражат банктар тарабынан берилүүдө. Быйыл беш миллиард сом тартылуусу пландалып жатат.
"Ипотекалык кредиттердин берилүүсү 25-марттан башталып, учурда ага 21 адам ээ болду. Кредиттин минималдык суммасы 270 миң сом болсо, эң жогоркусу жарым миллион сомду түзөт. Жалпы жонунан 17 миллион 401 миң сом берилди. Төлөө мөөнөтү 8,7 жылдан 15 жылга чейин каралган", — деп айтылат маалыматта.
Азырынча ипотекалык насыя алуучулардын тизмесинде 185 адам турат. Программага кирүүнү каалоочулар үчүн каттоо уланууда.
