БИШКЕК, 14-май — Sputnik. Сот "Элдик парламенттин" мүчөсү Бекболот Талгарбековду эки айга камакка алуу чечимин чыгарды. Бул тууралуу анын адвокаты Тимур Жанаев билдирди.
Талгарбековдун баш коргоо чарасын Биринчи Май райондук соту карады.
Эскерте кетсек, 12-майда УКМКнын кызматкерлери "мамлекеттик бийликти күч менен тартып алууга даярдык көрүү" жана "бийлик адамына карата зомбулук кылууга даярдануу" деген шек менен "Элдик парламенттин" өкүлдөрү делген Бекболот Талгарбеков, Төрөбай Колубаев жана Марат Султанов кармалып, аларга карата кылмыш иши козголгон.
Жанаев соттун чечимине макул эместигин билдирип, дүйшөмбү күнү сотко доо арыз менен кайрыла турганын кошумчалады.
Ал эми УКМКнын маалыматы боюнча учурда сот Султанов менен Колубаевдин баш коргоо чарасын карап жатат.
