БИШКЕК, 13-май — Sputnik. Кичинкей кызга машинаны айдаткан маршрутканын ээси кармалып, ага 2 миң сом айып салынды. Бул тууралуу Бишкек ШИИБдин маалымат кызматы билдирди.
Буга чейин социалдык тармактарда болжол менен 10 жаштагы кыз маршрутканы айдап баратканын тартып алган күбөнүн видеосу катуу талкууланган.
"Айдоочунун ким экени аныкталды. Ал 1956-жылы туулган Бишкек шаарынын тургуну болуп чыкты. Ал кызынын кускусу келип кыйналганынан улам алдына алып алганын айтты", — деп маалымат кызматы белгиледи.
Айдоочуга баласын атайын отургучка отургузуп алып жүрбөгөнү үчүн 2 миң сом айып салынган.
