БИШКЕК, 13-май — Sputnik. Америкада абактан качып кеткен киши 48 жылдан кийин кармалгандыгы тууралуу Associated Press агенттиги жазып чыкты.
Коннектикут штатында 71 жаштагы Роберт Стаковиц (Robert Stackowitz) кармалды. Ал 1968-жылдан бери полициядан качып жүргөн.
Роберт Стаковиц 1968-жылдын август айында Жоржия штатындагы абакта төрт ай отургандан кийин качып кеткен. Ал адам өмүрүнө кол салгандыгы үчүн 17 жылга кесилген. Ошол убактан тарта Коннектикут штатындагы Хартфорд шаарынын чет жакасында жашынып, кайыктарды оңдоо боюнча чакан иш ачууга жетишкен.
Качкын социалдык камсыздандырууга арыз менен кайрылгандан кийин гана кармалган. Полиция кызматкерлери беш ай бою анын азыркы келбети менен жаш маалындагы сүрөтүн салыштырып убара тартышкан. Натыйжада оозунан, мурдунан жана кулактарынан окшоштуктар табылып, качкындын бети ачылды.
