БИШКЕК, 12-май — Sputnik. Ысык-Көл облусунун Ак-Суу районундагы Теплоключенко айылында жээнин атып салды деп шектелген милиция кызматкеринин ишин прокуратура тергеп жатат. Бул тууралуу ОИИБден билдиришти.
Каргашалуу окуя 10-майда кечки саат сегиздер чамасында болгон. Маалыматка ылайык, шектелип жаткан 28 жаштагы жаран Каракол ШИИБде иштейт. Андыктан кызмат адамы катышкан кылмыш ишин прокуратура карай турганын ОИИБден кабарлашты.
"Бул окуяга кызмат адамы катышып жаткандыктан бардык иштер прокуратурага берилди. Ишти ошолор тергейт", — дейт башкармалык.
Учурда окуянын чоо-жайын аныктоо боюнча тергөө амалдары жүрүүдө.
Аталган факты боюнча Кылмыш жаза кодексинин 97-беренеси ("Адам өлтүрүү") боюнча кылмыш иши козголду. Шектүү жаран Каракол шаардык убактылуу жайына киргизилген.
