БИШКЕК, 10-май — Sputnik. Кемин районунда Бишкек — Торугарт автоунаа жолунун 114-чакырымында Toyota Ipsum үлгүсүндөгү машина жолдон чыгып оодарылып, бир адам каза болду. Бул тууралуу Өзгөчө кырдаалдар министрлиги билдирди.
Маалыматка ылайык, унаада айдоочусу менен кошо жети жүргүнчү болгон. Анын бирөө 27 жаштагы Калбүбү Байтокова Кемин райондук ооруканасынын реанимация бөлүмүнө жеткирилип, ошол жактан каза болгон.
Калган алты жүргүнчү жабыркаган эмес. Кырсык болгон жерге келген куткаруучулар унааны түздөп, жолго чыгарышкан.
